Aktiban kontsulta gehien sortzen dituzten gaiak Segurtasunari, Erantzukizunari eta Aseguruei buruzkoak dira. Jardunaldi tekniko honekin enpresa, profesional eta baita erakunde guztiak kezkatzen dituen gai bat sakonki jorratu nahi dugu, Sektorearen garapenean eta irudian funtsezko elementua baita.

Arlo guztietan segurtasuna bilatzea saihestezina den errealitatea da dagoeneko, eta are garrantzitsuagoa da Turismo Aktiboan, “arriskutsu” gisa aurkezten den eta arrisku jarduerekin lotuta dagoen sektorea baita. Beraz, segurtasunaren eta arriskuen kudeaketaren tratamendu zuzena biltzen duten gai guztiak orokorrean ezagutzea funtsezkoa da sektoreko ekintzaile eta profesionalentzat.

Oinarri estrategikoa da, zeinak zeharka profesional guztiei maila ezberdinetan eragiten dien: jardueren kudeaketa, komertzializazioa, komunikazioa, etab. Erakunde batek arazo asko izan ditzake negozioa kudeatzeko, baldin eta ez badu segurtasuna maila ezberdinetan kontuan hartzen, eta ez badu ikusgai eta aktiboki lan egiten.

Euskadin gaur egun Turismo Aktiboko 200 enpresa inguru daude, zeinak gehienbat profesional autonomoak eta espezialitate ezberdinetan lanean diharduten enpresa txikiak diren. Alor honetan, oso garrantzitsua da hausnarketarako guneak eskaintzea, hartara, administrazio publikoek, hezkuntza arloak, profesionalek eta enpresek komunikazio bideak ezar ditzaten. Horren helburua da hobekuntza-tresnak aurkitzea, sektorea indartzen laguntzeko, eta kalitatezkoak eta seguruak diren helmuga turistikoak  sortzeko.

Gainera, urtero ekimen berriak sortzen dituzte sektore honetan hasi nahi duten gazteek. Mota honetako jardunaldiak, eta bereziki orain segurtasunari buruz proposatzen duguna, funtsezkoak dira ekimen horiek laguntza handia izan dezaten; izan ere, gai hauek ez dira maila pribatuan jorratzeko errazak, eta negozioaren garapenerako funtsezkoak dira.